Чаа школалар ам-даа немежир

Тывада «Өөредилге» национал төлевилели-биле үш дугаар ээлчегни узуткаар дээш школалар тудуунуң ажылдары кидин түлүк чоруттунуп турар.

Бо чылын Балгазын, Бай-Хаак, Сукпак, Каа-Хем суурларда 616 олуттуг база Кызыл хоорайда 825 олуттуг үш школа тудуглары эгелээн. ТР-ниң Өөредилге яамызы дыңнадып турары-биле алырга, план езугаар тудуг объектилерин 2023-2024 чылдарда ажыглалче киирер ужурлуг.

Кызылда Бай-Хаак кудумчузунда 825 олуттуг школа тудуунуң белени 52 хуу. Немелде керээ езугаар «Бенконс» КХН ук объектини 2023 чылдың август 30-де ажыглалче киирер.

Ийиги объектини Кечил-оол кудумчузунга тудар. 825 олуттуг ниити өөредилге школазын 2024 чылда ажыглалга киирери планнаттынган. Төлевилел документациязы «ТрансСтройКонструкция» КХН төлевилел организациязы-биле ажылдап кылырының чадазында. Школа тудуу төлевилээшкин, тудуг болгаш объектини ажыглалче киирер талазы-биле ажылдар күүсеттине бээрге-ле эгелээр.

«Вавилин ээтпээ» микрорайонда 825 олуттуг школа тудуунуң талазы-биле күрүне керээзин «Өлчей» кызыгаарлаан харыысалгалыг ниитилел-биле чарган. Тудуг объектизин 2023 чылдың төнчүзүнге чедир ажыглалче киирер.

ТР-ниң Дээди Хуралының өөредилге, культура, аныяктар политиказы болгаш спорт талазы-биле комитеттиң даргазы Аяна Монгуш “Өөредилге” национал төлевилелдиң ачызында республикада школалар тудуу немежип турарын онзалап демдеглээн.

“Төлевилелдиң сорулгалары тодаргайы-биле айыттынган – школаларда үш дугаар ээлчегни узуткаары. Ол дээрге уругларны чогуур өөредилге-биле хандырары база таарымчалыг байдалдарны тургузары. Уруглар бистиң келир үевис болгай. Амгы үениң дериг-херексели-биле дериттинген делгем, чырык, чылыг оран-савага олар өөренир ужурлуг” – деп, депутат школалар тудуунга хамаарыштыр санал-оналы-биле үлешкен.

Найысылалда чүгле Бай-Хаак кудумчузунда 825 олуттуг школа муң хире оолдар, уругларны хүлээп алыр. “Өөредилге” национал төлевилелдиң чорудуу-биле школаларда үшкү, ийиги ээлчегни узуткаары көрдүнген.