Булуң-Терек суурга тускай шериг операциязының киржикчизи Андрей Тюлюштуң чырык адынга тураскаадып чаа стадионну байырлыг байдалга ажытканын чагырга чери дыңнаткан.
«Ангыр» стадионнуң ажыдыышкынынга Чаа-Хөл кожууннуң чагырга даргазы А.В. Одегей, Кызыл-Даг сумузунуң чагырга даргазы А.К. Дамба, дайынчы маадырның авазы С.Б. Тюлюш дээш оон-даа өскелер киришкен.
Аркадий Одегей чалданыш чок, төлептиг маадырны кижизиткен ие Светлана Тюлюшке өөрүп четтиргенин илереткен.
18 сес харга чедир оолдар аразынга тыва хүреш маргылдаазынга 39 аныяк мөге киришкен.
Сүт-Хөлден Чамыян Кара-Сал шүүлген, Улуг-Хемден Тамерлан Байыр-оол үжүүрлешкен. Үшкү-дөрткү черлерде Станислав Кыргыс (Тес-Хем) биле Давид Сендель (Кызыл).
Бештен сесче кирген мөгелер – Соруктуг Монгуш (Кызыл), Айдыс Куулар (Чөөн-Хемчик), Айыжы Лопчатмаа (Эрзин), Күдер Кара-Сал (Чаа-Хөл).
Шылгарап үнген база «Тиилелгеже чүткүл», «Чараш девиг», «Чараш арга», «Аныяк мөге» тускай шаңналдарга төлептиг болган мөгелерни тус-тузунда шаңнап-мактаан.