Тываның Тудуг яамызының дыңнадып турары-биле алырга, республикада «Демография» национал төлевилелдиң күүселдези-биле туткан назы четпээн уругларга чаа беш уруглар садын ажыдарынга белеткенип турар.
Республикада үш болгаш оон хөй ажы-төлдүг өг-бүлелер хөй болганындан, российжи субъектилерниң аразындан уруглар садынга хереглел улуг. Тываның Баштыңы Владислав Ховалыг школа назыны четпээн өөредилге албан черлериниң чедингирин хандырары тус чер чазааның мурнады боттандырар ажылдарының бирээзи деп демдеглээн.
Владислав Ховалыг бо чылын ол өөредилге объектилериниң тудуун үе-шаанда доозар дээш, немелде акшаландырыышкынны хаара тудуп, федералдыг бюджеттен 304 сая рубльди угландырган.
Чөөн-Хемчик кожууннуң чагырга даргазының хүлээлгезин күүседип турар Чойган Монгуш Чадаана хоорайда 60 олуттуг уруглар садының тудуун хынап четкен. Тудуг объектизинде ажыл кидин түлүк чоруп турарын ол медеглээн. Чойган Монгуш чаштар өргээзин ажыглалче кииреринге чедир каш-ла хонук артканын соцчеткилерде бижээн.
2021 чылда «Демография» национал төлевилел-биле, Каа-Хем кожууннуң чедери берге Эржей суурга, Ак-Довурак база Чадаана хоорайларга, ыраккы Тере-Хөл кожууннуң Кунгуртуг база Кызыл кожууннуң Каа-Хем суурларга 360 уруглар хүлээп алыр беш уруглар садын тудуп эгелээнин сагындыраалы. Төлевилелде чүгле тудуг тудары эвес, а амгы стандартарга дүүштүр эт-сеп-биле чүмнеп, уруглар ойнаар шөлдерни чаагайжыдары көрдүнген.
Уруглар садтарын ажыдары-биле амгы үеде кадрларны четчелээр, эт-севин салыр, садикке кээр бир хар чартыктан үш харга чедир уругларның даңзызын тургузуп турар.
