Улуг Октябрьның социалистиг революциязының хүнүнде Чааты ортумак школазынга ийи аңгы салгалдың – совет биле амгы школачыларның ужуражылгазы болуп эрткенин чагырга чери дыңнаткан.
Ужуражылгаже совет үениң салгалдары – пионержилерни, алдар-аттыг хоочуннарны чалаан. Чааты сумузунуң хоочуннар даргазы Айлаң Ондаровна, школа коллективиниң хоочуннар даргазы Римма Маргыыевна, оралакчызы Марина Анай-ооловна хемчегни организастап эрттирген.
Мария Дамчай амгы салгалдарга октябрят, пионер, комсомол, партия дугайында тайылбырлап, октябрятчы, пионержилерниң эт-херексели-биле таныштырарга, амгы үениң «эзирлери» аажок сонуургаан. Ол чаа үнген «Көктүг-шыктыг Көк-Чыраамны» деп номун школаның ном саңынга белекке берген.
Улуг чогаалчы, Чаатының чоргааралы Кара-оол Натпий-оолдуң уйнуу кырган-ачазының Чодураа суур дугайында шүлүүн ужуражылганың киржикчилеринге бараалгадып берген.
Аалчыларга «Көдээ суурларның амгы овур-хевири» төлевилел-биле туттунган чаа школаның иштин сонуургадып, экскурсиялаткан.
