Чадаанада «Өг-бүлеге» деп баш таарар чер ажыттынган

Чөөн-Хемчик кожууннуң төвү Чадаанада «Өг-бүлеге» деп баш таарар черни Ай-Суу Монгуш май айда ажыдып алган.

“Социал керээ” программазының киржикчизи күрүне деткимчезин алгаш, улуг беш көрүнчүк, тускай чымчак сандайлар, баш таарарынга херек дериг-херекселдер, ону шыгжаар эт, ээлчээн манап турар улуска диван, суг чылдыр, баш чуур болгаш дезинфекция кылыр херекселдерни садып алган. Ол Чадаананың төвүнде ийи каът оран-саваның бир улуг өрээлин хөлезилеп турар.

Ай-Суу Монгуш көрүнчүктүг олуттарны хөлезиге берип, чаңгыс чер-чурттугларынга акша-төгерик ажылдап алыр арганы тургускан. Ниитизи-биле дөрт кижини ажылчын олут-биле хандырган. Ооң-биле кады эр улустуң баш таарыкчызындан аңгыда холдуң дыргактарын хевирлеп кылыр, эрин, кирбик будуур, арын-шырай чараштаар мастерлер ажылдап турар.

Баш таарыкчызы хууда ажыл-херээн ажыдып алыр дээш, Чөөн-Хемчик кожууннуң Чонну ажылга хаара тудар төвүнче документилерин дужаагаш, комиссияга төлевилелин ажыктыын тайылбырлап, шынзыдып шыдаан. Монгуштарның өг-бүлези үш ажы-төлдүг.

Ай-Суу Монгуш – бешки разрядтың универсал баш таарыкчызы. Ол Тываның политехниктиг техникумунга үш чыл өөренген. Социал деткимче алыкчызы баш таарарындан аңгыда, чашты будуур, эмнээр, хол-буттуң дыргактарын хевирлеп кылып билир. Ук мергежилдерге улусту өөредип болурун ооң дипломунда база бижээн.

– 2009 чылдан тура баш таарыкчызы болуп ажылдап тур мен. Мооң мурнунда өске баш таарар черлерге олутту хөлезилеп турдум. “Социал керээ” программазының дугайында мооң мурнунда дыңнаан-даа болзумза, аңаа киржирин бодавайн турган мен. Даараныр чер ажыдып алган Эмма Конгар ук программага киржирин сүмелээн.

Документ чыырынга кандыг-даа бергедээшкиннер турбаан. Оруум ала чайгаар-ла ажык турган боор. Ам дыка өөрүп тур мен. Күрүнеден алган деткимчени кызымаккай ажылым-биле бадыткаары арткан. Шилип алган мергежилимге ынак болгаш ажылымче улуг күзел-биле баар мен.

Баш таарар күзелдиг улус мастер-класстар эрттирерин бо-ла дилээр. Ынчангаш бо айтырыгны өөренип көрүп, чоорту өөредилге төвүн ажыдарын боданып турар мен – деп, баш таарыкчызы ажылын таныштырды.

Баш таарар черниң мастерлери – келген улустуң, ылаңгыя херээжен чоннуң арын-шырайын, холунуң дыргактарын хевирлеп, чараштыр будуп, чажын аянныг кылдыр эдип, чаа аян-шинчиже хуулдуруп турар илбичи кыстар-дыр.

Чуруктарны Шончалай Ховалыг тырттырган