Чайгы дыштанылга үезинде үстүкү классчылар чүгле бойдуска дыштаныр эвес, харын-даа акша ажылдап алыр аргалыг. Шак ындыг арга күш-ажыл лагеринде көрдүнгенин ТР-ниң Өөредилге яамызы дыңнаткан.
Кызылдың 5 дугаар гимназиязының школа чанында лагериниң бир отряды – күш-ажылчы. «Эколята» деп аттыг отрядче 14 хардан 17 харга чедир назылыг 20 уруг барып турар. Оларның кол сорулгазы – хоорайны ногаанчыдылгазы. Лагерь отрядының кежигүннери “Чаагайжыдылга” муниципалдыг унитарлыг бүдүрүлгезиниң ажылдакчыларынга найысылалдың кудумчуларын, парк болгаш өске хөй-ниити черлерин ногаанчыдары-биле дузалажып турар.
Күш-ажыл ажыл-чорудулгазындан аңгыда, уругларның хүн чурумунда эртенги сула шимчээшкиннер, үш катап чемненилге, культура-массалыг болгаш күш-культура-кадыкшыдылга хемчеглериниң программазы көрдүнген.
Элээдилерни чайгы дыштанылга лагерьлеринге түр када ажылга хаара тудары – акша ажылдап алыр эки арга болгаш ону бодунуң күзели-биле ажыглаары база боттарын улуг кижи ышкаш, хамаарылга чок кылдыр санаары. Кол сорулга – назы четпээннерни күш-ажылга хаара тудары.
Чайгы күш-ажыл лагеринде ажыктыг дыштанылга
13 июля 2022
87