Тывада уругларның чайгы кадыкшыдылга дыштанылгазы уламчылап турар. Чайгы үеде хоорайда школалар чанында болгаш хоорайдан дашкаар дыштанылга лагерьлеринге ниитизи-биле 16000 уруг хаара туттунар ужурлуг дээрзин ТР-ниң Өөредилге яамызы дыңнаткан.
Уругларның хөй кезии хоорайдан дашкаар лагерьлерде, ук лагерьлер саны республикада – 19, дыштанып турары демдеглеттинген. Хоорайдан дашкаар лагерьлерге уругларның сонуургалы улуг болгаш, чай дургузунда 4000 ажыг уругну хаара тудары көрдүнген. Хоорайдан дашкаар лагерьлерниң бирги сезонда 1232 уруг дыштанган, дыштанылганың бирги сезону дооступ турар. «Бельбей» биле «Чодураа» лагерьлерде ийиги сезон ажыттынып, уругларны уткуп хүлээп алган.
Бо хүнде уругларның чайгы кадыкшыдылга лагерьлеринче путевкалар шуптузу саттынганын яамы дыңнадып турар. Ада-иелерниң уругларының чайгы дыштанылгазын эки, таарымчалыг организастап турары өөрүнчүг. Келир чылын база чайгы дыштанылга лагерьлеринче уругларны манап турар.
Дыңнадып каар чүүл – регионнарга бүдүн чыл дургузунда ажылдаар лагерьлерни ажыдар арганы бээр база бар лагерьлерни чаартыр дээш хоорайдан дашкаар лагерьлерни чаартыр талазы-биле федералдыг программаже киирер ажыл чоруттунуп турар. Чижек кылдыр алырга, Тываның Баштыңы Владислав Ховалыгның деткимчези-биле «Азас» лагеринде чаартылга эгелээн. Келир чайын аңаа чаа чаагайжыттынган бажың болгаш делгем чемненир чер ажыттынар.
Уругларның дыштанылгазынга хамаарыштыр айтырыгларны дараазында дугаарже долгап, тускай мергежилдиглерден тодарадып ап болур: +7(394)222-72-92.
