Тываның өөредилге сайыдының хүлээлгезин күүседип турар Орлан Соян уругларның чайгы кадыкшылга кампаниязының баш бурунгаар түңнелдерин дыңнаткан. Бо чайын 18706 уругну дыштанылгаже хаара туткан. Чайгы дыштанылга үезинде уругларны 168, ооң иштинде 21 стационар, 145 хүндүскү база ийи майгыннарлыг лагерь хүлээп алган. Чай дургузунда 17,6 муң уруг аңаа дыштанган.
“Артек”, “Океан”, “Смена”, “Орлёнок” база “ Алые паруса” федералдыг лагерьлерге 92 уруг дыштанган. Аңгы-аңгы аарыгларлыг 1019 уругну тускай путевкалар-биле чурттуң санаторийлеринче болгаш курорттарынче чоруткан.
Дыка хөй чылдар дургузунда септелге чок турган дыштанылга лагерьлерин чаартыр талазы-биле улуг ажылдар бо чылын кылдынганын Тываның Баштыңы Владислав Ховалыг демдеглээн. Ол лагерьлер оран-саваларының болгаш тудугларының айыыл чок чоруу стандарттарга дүгжүп турарын онза кичээнгейлиг хынаарын, ол ышкаш дыштанылга кампаниязын организастаанының шынарын сайгарап көөрүн дааскан.
Хыналда-хайгаарал органнарының илереткен четпестерин чайладыр улуг ажыл манап турар. Уругларның айыыл чок чоруун, чайгы дыштанылгазын база хостуг үезин бедик деңнелге организастаары чугула деп демдеглээн.
Илереттинген хажыдыышкыннарны чайладыр хемчеглерни албан черлер аразының комиссия күжү-биле октябрь 1-ге чедир ажылдап кылырын ТР-ниң Чазак Даргазының оралакчызы Орлан Сарыгларга дааскан.
