Чөөн-Хемчик кожууннуң девискээринде малчын турлагларга «Айыыл чок» акция езугаар хыналда үнүүшкүннер уламчылап турарын ТР-ниң Өөредилге яамызы дыңнаткан.
Бо удаада Хайыракан сумузунуң девискээринде чайлагларны хынаан. Ниитизи-биле алды малчын турлагга четкен, ында сес назы четпээн уруг ада-иезиниң чанында чайгы дыштанылгазын эрттирип турар.
«Чайлагларга болгаш хем-суг эриинге уругларның айыыл чок чоруунуң талазы-биле профилактиктиг ажылдар чоруттунуп турар. Сумунуң девискээринде алды чайлагга чедип, ада-иелер болгаш хоойлу езугаар төлээлер-биле чугаалажып, чайгы үеде назы четпээн уругларның айыыл чок чоруун хандырарының дугайында сагындырган бис. Уругларга болгаш ада-иелерге «Хем-сугга айыыл чок чоруктуң дүрүмнери» база «Ада-иениң харыысалгазы» деп профилактиктиг тайылбырны кылган» – деп, сумунуң ажылдакчылары дыңнаткан.
