Чайлагларга амыр-менди дыштанылга

Чайгы дыштанылга үезинде уруглар, оолдарның амыр-менди ойнап-хөглээринче, озал-ондакка таварышпазынче улуг кичээнгейни кожууннарның эрге-чагыргалары болгаш өөредилге эргелелдери салып турар.

Өвүр кожууннуң өөредилге эргелелиниң, Саглы сумузунуң чагырга чериниң, школазының төлээлери, медицина ажылдакчызы “Айыыл чок чаш назын дээш кады бис” деп акцияның чорудуу-биле Солчур база Саглы сумуларының девискээринде аалдарны кезээнин чагырга чери дыңнаткан.

Ниитизи-биле назы четпээн уруглар дыштанып турар 21 малчын турлагга чедип, чайлагларга уруг-дарыгның дыштанылгазын амыр-менди эрттирер талазы-биле тайылбыр ажылын чорутканнар.

Улуг кичээнгейни аалдар аразынга машина-балгаттыг аргыжарының айыыл чогунче, уругларның хемнерге эштиринче сагыш салырынче, аът-хөл-биле оваарымчалыг болурунче олар угландырганнар.

Ажылчын бөлүк кожууннуң малчын аалдарынче тайылбыр ажылдыг үнүүшкүннерни ам-даа уламчылаар.