Чаш Арзылаң мөге Сүгдер Донгактың найыры

Суг-Аксы сумузунга Тываның Наадым байырлалының 2023 чылдың тиилекчизи, «Чаш Арзылаң мөге» деп хүндүлүг аттың эдилекчизи Сүгдер Донгактың кежиин үлежип, чаш болгаш элээди оолдар аразынга республика чергелиг хуреш маргылдаазы болуп эрткенин Сүт-Хөл кожууннуң чагырга чери дыңнаткан.

Чаш Арзылаңның найырынга республиканын аңгы-аңгы булуңнарындан 145 хире чаш болгаш элээди мөге аалдап келген. Кожууннуң удуртулгазы Сүгдерниң чедиишкиннеринге өөрүп, бичии мөгениң сүлдезин көдүрүп, «Күчүтен» атка чедир хүрежирин күзээн.

Сүгдер Донгак – Суг-Аксы ортумак школазының ийиги клазының өөреникчизи. Чаш Арзылаң бичиизинден тура топтуг-томаанныг, кижизиг, биче сеткилдиг, ажылгыр-кежээ оол. Ол кырган-авазының дузалакчызы болуп өзүп олурар.

Хүреш маргылдаазы назы-хар аайы-биле үш аңгы чардынган бөлүкке болуп эрткен.

2016-2017 чылдың мөгелериниң аразынга бирги черни Сүт-Хөлден Дамба Ондар, 2014-2015 чылдың мөгелериниң аразынга бирги черни Чөөн-Хемчиктен Аганак Болат-оол, 2012-2013 чылдың мөгелериниң аразынга бирги черни Сүт-Хөлден Арбай Сат олар чаалап алганнар.