Чаш Чаан мөгениң найыры

Сүт-Хөл кожууннуң Ишкин сумузунга Наадым байырлалының 2022, 2023, 2024 чылдарда тиилекчизи Арбай Саттың «Тываның Чаш Чаан мөгези» деп атты алганын байырлап, төрел-чону-биле кежиин үлешкен найыры болуп эрткенин чагырга чери дыңнаткан.

Чаш мөгелер аразынга хүрешке күштүглерниң күштүү болуп, шүглүп унгеш, хүндүлүг атты чаалап алган Арбайның найырынга Тываның аңгы-аңгы булуңнарындан 145 хире чаш болгаш элээди мөге аалдап келген.

Чаш болгаш ээлээди мөгелер аразынга республика чергелиг тыва хүреш маргылдаазынга мөгелер назы-хар аайы-биле беш аңгы бөлүкке ачыр-дачыр тудушканнар.

– Шынап-ла, "Сүт-Хөл мөгелер чурту" деп тыва чоннуң чугаазы анаа эвес, шын бадыткалды херечилел чоруур. Арбай Сат чүс-чүс чылдарда күштүглерниң күштүү болган ат-алдарлыг хоочун мөгелеривистиң оруун изеп, соруун успейн, төлептиг салгап чоруур, келир үениң шыырак мөгези болурунга бүзүреливис улуг – деп, ТР-ниң уругларның национал хүреш федерациязының даргазы, Тываның Арзылаң мөгези Седен-Очур Кара-Сал чугаалаан.

Кожууннуң удуртулгазы экер-эрес Арбайның найырын эрттиреринге улуг улуг-хуузун киирген Ишкин сумузунуң удуртулгазынга, мөгениң ада-иези Амир биле Биче-Кыс Саттарга болгаш төрел чонунга сүт-хөлчүлерниң мурнундан кожууннуң удуртулгазы четтиргенини илередип, «Күчүтен мөге» атка чедир хүрежирин күзээн.