Бай-Тайга кожууннуң Бай-Тал сумузунга Сыдым Араптанның «Тыва Республиканың чаш Эзир мөгези» деп хүндүлүг атты алганын байырлап, ооң ада-иези болгаш төрелдери бичии мөгениң кежиин үлешкен найырын эрттиргенин чагырга чери дыңнаткан.
Сыдым Отчугаш биле Чойгаана Араптаннарның дун оглу. Ол Николай Конгар аттыг Бай-Тал ортумак школазының 6-гы классчызы, өөредилге чериниң үлегерлиг өөреникчизи. Бичии мөге үш харыындан хүрежип эгелээш, республика чергелиг маргылдааларга төлептиг киржип келген. Сыдым хүреш сонуургаарындан аңгыда, школада «Эдер-Куй» сыгыт-хөөмей ансамблиниң хөөмейжизи.
Бай-Тайга кожууннуң, Бай-Тал сумузунуң удуртулгазы чаш Эзирниң чедиишкиннеринге өөрүп, мөгениң сүлдезин көдүрүп, “Күчүтен” атка чедир хүрежип, Тываның база Бай-Тайганың төөгүзүнге балалбас исти арттырар алдарлыг мөге болуп өзерин йөрээген.
Кандыг-даа спортчунуң эң кол чөлеңгиижи тренер башкызы болур. Кожууннуң удуртулгазы бичии мөгениң тренери Айдыс Очур-оолга четтиргенин илереткен.
"Чаш Эзирниң" найырынга республиканың аңгы-аңгы булуңнарындан 150 хире бичии мөге аалдап келгеш, боттарының күжүн шенешкеннер.