Чаштар тыва улустуң тоолдарын ыдып, мөөрейлешкен

Чадаана хоорайда "Родничок" уруглар садынга кожуун чергелиг школа назыны четпээн уруглар албан черлериниң чаштарынын аразынга «Эки тоолчу» деп чараш мөөрей болуп эрткенин Чөөн-Хемчик кожууннуң өөредилге эргелели дыңнаткан.

Чөөн-Хемчик кожуунда ук мөөрейни эрттирери чанчыл болу берген. Чаштар тыва тоолдарны аянныг болгаш чараш ыдып турар. Мөөрейге кожууннуң 15 уруглар садындан чаштар киришкен. Уруг бүрүзү бодунуу-биле тускай онзагай болган.

Шииткекчи бөлүкке Чадана хоорайның драма театрынын директору Д.Д. Кара-Сал, театрның артизи Б.В. Ондар база школа назыны четпээн уруглар албан черлерин харыылап турар Ч.Ч. Монгуш ажылдаан.

Мөөрейниң түңнелинде «Хээлер» уруглар садындан киржикчи Дагын Дандар «Эки тоолчу» деп атка толептиг болган. Бирги черни Туяна Грачева («Улыбка» уруглар сады), ийиги черни Долума Бумба-Хуурак («Хүнчүгеш» уруглар сады, Бажың-Алаак), үшкү черни Сенди Монгуш («Чечек» уруглар сады, Шеми) ээлээн.

Тускай шаңналдарга төлептиг болган чаштар: «Эң тускай ыдылгалыг күүселде» – Анхела Куулар («Родничок» уруглар сады), «Чечен ыдылга» –Санчир Монгуш («Чечена» уруглар сады), «Онзагай ыдылга» – Элина Монгуш («Таежный» уруглар сады), «Келир үениң тоолчузу» – Субедей Монгуш (Чыраа-Бажы школазының белеткел бөлүү).

Мөөрейниң деткикчилери – кожууннуң өөредилге эргелели база "Родничок" уруглар сады.

Каш чыл уламчылап турар мөөрейниң кол сорулгазы – тыва улустуң тоолдарын чон аразынга нептередири, чаштарга таныштырып өөредири, тоолдарның шын күүселдезин кадагалап арттырары, бичии уругларның сүзүк болгаш мөзү-шынар, эстетиктиг кижизидилгезинге тыва улустуң тоолдарын ажыглаары база салым-чаяанныг уругларны илередири.