Берт-Даг ортумак школазының төөгү болгаш чурт шинчилел музейинге уругларга чеп эжеринге солун болгаш өөредиглиг хемчегни эрттиргенин өөредилге чери дыңнаткан.
Ус-шевер авалар – Чимита Сандый-оол биле Сайлыкмаа Хунакаа амгы үеде уттундуруп турар, бурун өгбелеривистиң ажылы – аът челинден чеп эжерин көргүскен.
Аалчылар баштай челди дыдып алырын, оон дүргектээрин, эжерин, сөөлүнде болу берген шынарлыг чеп-биле кажааны канчаар быжыглаарын көргүзүп, өөреткен.
Этнография залында кажаада буянныг, шевер аваларның кылган чевин экспонат кылдыр делгеп, ажыглалга киирген.
Өөредиглиг кичээл үезинде музейниң экскурсоводтары чепти канчаар, каяа ажыглап турганын, эжерде кандыг дүрүмнер барын база билип алганнар.
Часкы дыштанылга үезинде өөреникчилер чеп эжер ажылга улуг сонуургал-биле киришкен.
Школаның удуртулгазы сумунуң ус-шеверлеринге билиглери-биле үлежип, аныяк-өскенге ажыктыг чүүлдерни билиндирип өөреткени дээш четтиргенин илереткен.