Чазылар сумузунга дүрген харылзаалыг интернет дээш

Дүрген харылзаалыг мобильдиг интернетке коштунар ийи суур дээш онлайн-бадылаашкында Тожу кожууннуң Чазылар сумузунуң
чурттакчылары идепкейлиг киржип турар. Кайы кожууннардан кайы сумулар коштунары – чурттакчыларның идепкейлиг бадылаанындан хамааржырын сагындыраал.

Эрткен чылгы бадылаашкынның түңнели-биле бо чылын дүрген харылзаалыг мобильдиг интернетти баштай киирер суурларның даңзызынче Тывадан Ырбан, Качык болгаш Хүт сумулары кирген.

Россияның Чурагайлыг хөгжүлде яамызы дүрген харылзаалыг мобильдиг интернетти баштай киирер 100-ден 500 чурттакчылыг суурларны шилээн онлайн-бадылаашкынны Күрүне ачы-дузазының порталында эгелээн.

Дараазында айтыгга: gosuslugi.ru/inet бадылаашкынны эртер.
Чүгле Күрүне ачы-дузазының порталы таварыштыр эвес, а почта дамчыштыр база үннерин бээр арга бар. Чагаага ат-сывын, бүрүткеткен адрезин база Интернетти кайы суурже шөйерин айтыр. Чагааны Чурагайлыг хөгжүлде яамызының дараазында адрезинче чорудар: 123112, Москва хоорай, Пресненская наб., б.10, стр.2.

Онлайн-бадылаашкын август 13-ке чедир уламчылаар. Почта-биле чагааны сентябрь 10-га чедир хүлээр. Дүрген харылзаалыг мобильдиг интернетти киирер суурларның даңзызын декабрь 18-те албан езузунуң сайтызынга парлаар. Федералдыг төлевилелдиң оператору – “Ростелеком” компаниязы.