Шагааның бүдүү, кааң аяс хүнде, Тываның хамааты байдалдың актылар бижидилгезиниң Чеди-Хөл кожуунда эргелелинге Хүлер Куулар биле Кристина Муллахметованың ынакшылын быжыглап, чуртталганың оруун кады чурттап эртер бис деп, даңгыраан солчур, онзагай найыр-дойлуг чараш байырлал болуп эрткенин кожууннуң төп ном саңы дыңнаткан.
Байырлалдың кол маадырлары өг-бүле тудуп бадылашканының дугайында шынзылга бижикти алганнар. Бадылашкан аныяк өг-бүлениң аас-кежиктиг хүнүнде, кеткен тыва национал хеп-сыны байырлалды улам аян, каас-шинчи байдал-хөөннү киирген.
Ном саңының ажылдакчылары аныяктарны деткип, чыглып келген чонга дүгдээшкин, чавага дугайында билиглерни чыглып келген чонга дыңнатпышаан, дүгдээшкин, чырыктажыышкын езулалдарын эрттирип, йөрээлдерин салыр аас-кежиктиг болганнар.
Тыва езу-биле бадыланчып турар интернационалчы аныяктарны Чеди-Хөл кожууннуң даргазы Адыгжы Араптан, социал айтырыглар талазы-биле орлакчызы Нина Монгуш болгаш Хүлер Кууларның ажылдап турар хөгжүм школазының даргазы Аида Куулар, профком даргазы Шораана Монгуш олар байыр чедирип, белектерин сөңнеп келгеннер.
Ном саңының коллективи Тывада ам бир төлептиг аныяк өг-бүле немешкенинге өөрүп, Кууларларга белек-селээн сөңнеп, бүзүрелдиг ынакшылды, аас-кежикти, чөпшээрежилгени, быжыг кадыкшылды, узун назынны күзээн.