Краснодар крайның Туапсе районунда бо хонуктарда «Чедиишкинниң мастерскаязы» деп IX Бүгү-российжи профэвилел тренинг-лагерь эртип турарын ТР-ниң Өөредилге яамызы дыңнаткан. Ооң сорулгазы – башкыларның мөөрейлер аразында үделгези болгаш оларның улаштыр мергежил маргылдааларынга белеткели.
Июль 3-тен 13-ке чедир тренинг-лагерьниң ажылының иштинде методиктиг лекциялар, дуржулга солчулгазы, «төгерик столдар» база консультациялар эртип турар.
Тренинг-лагерьде Бүгү Россияның регионалдыг чадазының тиилекчилери – «Чылдың кижизидикчи башкызы-2023», Кызылдың 3 дугаар уруглар садының логопед башкызы Татьяна Галкина, «Чылдың башкызы-2023», Чеди-Хөл кожууннуң Хову-Аксы суурнуң англи дыл башкызы Алдын-кыс Куулар олар киржип турар.
Ук тренинг-лагерьде киржилге бистиң башкыларга боттарының билиин, арга-мергежилиниң дуржулгазын бараалгадып, мөөрейниң түңнелинде республиканың адын төлептии-биле төлээлээр тергиин арганы бээр.
