Тываның кадет корпузунга "Чедиишкинниг кыс кижи – кымыл ол?" темалыг солун ужуражылга болуп эрткенин өөредилге чериниң тыва дыл болгаш чогаал башкызы Лидия Ооржак дыңнаткан.
Тыва Республиканың Чогаалчылар эвилелиниң кежигүнү, шүлүкчү, болчукчу эртемниг блогер Алдынмай Саган-оол уругларга бодунуң школачы болгаш студент чылдарындан сактыышкыннарны таныштырып, эки кижи болурунуң чажыттарын чугаалап берген.
"Бо ужуражылга мооң-биле төнмес, силерге сүме, дуза херек апарза, харылзаавыс үспес бис, уруглар" – деп, аалчы ажыт-чажыт чок, солун эрткен ужуражылганы түңнээн.
Уруглар ужуражылгадан боттарынга ажыктыг медээлерни дыңнап алганнар.
- Бодунда бар эки чаңчылдарны сайзырадыр.
- Бодунда бар багай чаңчылдарны адырар.
- Өскелерге дузалажып чоруур.
- Бодунуң күжүнге бүзүреп, бодун деткип, мактап чоруур: "Сен шыдаар сен!".
- Бодунуң дугайында чугааларны сеткилинче киирбес, чоок албас.
Уруглар аалчызынга өөрүп четтиргенин илередип, Иелер хүнү болгаш кел чоруур Чаа чыл уткуштур эки күзээшкиннерни, белекчигешти сөңнээн.
