Өвүр кожууннуң спорт школазында болгаш Доржу Казакин аттыг стадионга Хандагайты ортумак школазының доозукчулар аразынга спартакиада болуп эрткенин чагырга чери дыңнаткан.
Чээрби үш чыл уламчылап турар спартакиаданы бо чылын 2001 чылдың доозукчулары бедик чараш деңнелге ажыткан.
Чылдан чылче доозукчулар саны немежип, спортчу оюннарның шынары улам-на бедип, негелделер шыңгыырап, чараш чүүлдерни киирип эрттирип турарын кожууннуң чагырга даргазы Айдыс Куулар демдеглеп чугаалаан.
Кожуунувуста улуг хемчээлдиг спортчу маргылдааларның бирээзи – доозукчулар спартакиадазы, ооң эгелекчилери Сергей Куулар болгаш 1986 чылдың доозукчулары.
Амыдыралдың кадык овур-хевирни суртаалдаан, чаңгыс классчыларның найыралын быжыктырган спартакиадада 2001-ден 2013 чылдын доозукчулары киржип турар.
Спартакиадага хол бөмбүү, баскетбол, хөглүг старттар, дартс, стол теннизи, аргамчы тырттар оюннар кирип турар. Спортчу оюннарны көрүп келген чон чылдың-на дыка хөй болур.
Хандагайты ортумак школазының доозукчулар аразында спартакиаданың хоочун тергиин ойнакчылары Анжелина Монгуш база Альберт Сатка Тыва Республиканың "Күш-культураның болгаш спорттуң тергиини" деп хөрек демдектерин кожууннуң чагырга даргазы тывыскан.
Маргылдаадан ангыда, доозукчулар башкыларын алгап-мактап, четтиргенин илереткеннер.