Бии-Хем кожууннуң Аржаан сумузунда школа чанының «Челээш» хүндүскү лагериниң бирги сезону хагдынган.
Кижизидкчи башкылар уругларга солун хемчеглерни эрттирип турда, чээрби хүн билдиртпейн эрте берген. Ниитизи-биле дыштанылга лагеринче 50 уруг барып турган. Оларның аразында өскүс база амыдыралы чегей болгаш хөй ажы-төлдүг өг-бүлелерниң уругларын хаара туткан.
Уругларның хүн чуруму тургускан график езугаар эртенги сула шимчээшкиннерден эгелээр. Ажык дээр адаанга олар чуруктар мөөрейинге, хөглүг старттарга күзелдии-биле киржип турган. Оолдар, уруглар угаан сайзырадыр болгаш делегей чоннарының оюннары-биле таныжып, дыштанылгазын ажыктыг эрттиргеннер.
Дыштанылга лагериниң ийи паштанчызы уругларга хоолулуг аъш-чемни кылып берип турган. Чаңчыл езугаар четверг санында – балыктан чем кылыр хүн.
Бирги сезонну байырлыг байдалга хаап турда, кижизиттирикчилерге солун оюн-тоглааны эрттирген. Уругларга чымчак ойнаарактарны, оолдарга хөл бөмбүү болгаш конфет, чимистиг хаптарны тывыскан. Мага-хандыр дыштанган уругларның ада-иези башкыларга четтиргенин илереткен.
«Челээш» хүндүскү лагерьниң начальниги Чодураа Достук негелде езугаар ажылдакчылар шупту Covid-19-ка удур тарылганы эрткенин дыңнаткан.
#Бии_хемкожуун #Аржаан #Чайгыдыштанылга #Школачаныныңлагери #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
