Чер ажыл-агыйлары деткимчени алыр

Бо чылын республиканың чер ажыл-агыйлары часкы хову ажылдарынга 62 сая рубльди алыр. Ресубликаның Көдээ ажыл-агый болгаш аъш-чем яамызы бо хүнде 27 сая рубльди ажыл-агыйларның агар саннарынче шилчиткен.

Бедик шынарлыг үрезиннер бүдүрүлгезинге база гектарга деткимчениң субсияларын чер ажылдыг ажыл-агыйлар алыр. Оон аңгыда 102 арат ажыл-агыйлары мал чеминиң үрезинин садып база сөөртүп алырынга акша-хөреңгини алган. Ыраккы кожууннарда чер-биле холбаалыг ажылдыг 78 кижи шөлдерин чарып, илииртеп эгелээн.

Республиканың эң улуг чер ажыл-агыйлары – араттар “А.П. Желтухин тараачын-арат ажыл-агыйы”, “ Г.А. Ким тараачын-арат ажыл-агыйы”, хуу сайгарлыкчылар Р.А. Сат, А.Б. Дадар-оол база күрүне деткимчезин алырлар.

– Акша-хөреңгиниң 43 хуузу часкы хову ажылдарының аңгы-аңгы угланышкыннарынче хувааттынган. Апрельдиң ортузунга чедир саң-хөө акшаларын төндүр шилчидер планныг бис – деп, Тыва Республиканың көдээ ажыл-агый болгаш аъш-чем сайыдының бирги оралакчызы Лариса Монгуш дыңнаткан.

ТР-ниң Көдээ ажыл-агый болгаш аъш-чем яамызы эгелеп чоруур араттарны, өг-бүле фермаларын база көдээ ажыл-агый кооперативтерин деткииринче угланган күрүне программалары-биле көдээ ишчилерге улуг дузаны чедирип турарын сагындыраал.