Хакасияда чурттап, ажылдап, өөренип турар тывалар Черногорск хоорайга Шагааны уткуп, байырлаанын "Энерел" чаңгыс чер чурттугларның хөй-ниити организациязы дыңнаткан.
Байырлыг хемчегге киржип келген аалчылар тевек теверинге, кажыктаарынга, бардамнаарынга, хендирбе сый шаварынга, шоодайда чигир көдүреринге, аът шалбадаарынга, узун тынышка, дүрген чугаага мөөрейлешкен.
Тиилекчилер болгаш идекпейклиг киржикчилерни шаңнап-мактаан. Оон аңгыда делгелге база болуп эрткен. Шеверлер боттарынның даарап, кылып турар национал хептерин, суй белектерин, ойнаарактарын таныштырып, көргүскеннер.
"Энерел" чаңгыс чер чурттугларның идепкейжилери, тыва чоннуң ыдыктыг байырлалы – Шагааны бедик деңнелге эрттирген. Хөй-ниитижилер дуза кадып келген чонунга, деткикчилеринге четтиргенин илереткен.