Сүт-Хөл кожууннуң чагырга даргазы Орлан Монгуш Чес-Булуң бажы, Чалбак-Хараган девискээринде көвүрүгнүң тудуу доозулганын дыңнаткан.
– Чаа көвүрүг-биле Кара-Чыраа, Суг-Аксы, Бора-Тайга сумуларының малчыннары, Шаараш аржаанынче кадыкшылын быжыктырып алыр дээн улус аргыжар. Оон аңгыда Сүт-Хөл унер оруктарже машиналыг чедип алырынга эптиг.
Эң кол чуул – ында чурттап турар малчыннарга сиген, мал чеми чедирип алырынга эптиг байдал тургустунган.
Объектини хууда сайгарлыкчы Анатолий Ондарның бригадазы туткан. Көвүрүгнүң узуну – 30 метр, дооразы – 7 метр.
Көвүрүг кежииниң бертинде Суг-Аксы-биле аргыжар улуг оруктарга ам-даа дөрт бичии көвүрүгнү кылыры планнаттынган. Сиген кезер сезон дооступ, суг тыртыла бээрге, ол-ла бригада-биле ажылдарны улаштыр кылыр кылдыр дугурушкан.
Тус-чер эрге-чагыргазының шиитпирлээр кол айтырыгларының бирээзи – малчын коданнарже чедер оруктарны болгаш көвүрүглерни кылыры.
Тудугжуларга кыска үеде көвүрүгнү тутканы дээш кожуун чагыргазының болгаш сүт-хөлчүлерниң мурнундан четтиргенивисти илередип тур бис! – деп, чагырга даргазы соцчеткиде хууда арнында бижээн.