Арыскан суурнуң чурттакчызы Чочагай Бегзи бичиизинден тура торт, пирожное быжырар күзелдиг турган. Социал керээге үндезилээн күрүне деткимчезиниң ачызында ол күзелин амыдыралда боттандырганын чагырга чери дыңнаткан.
Улуг-Хем кожууннуң чонну ажылга хаара тудар төвүн таварыштыр ол Кызылга торт быжырар курстарга өөренип алган. Күрүне деткимчези-биле дериг-херекселдерни садып алгаш, “чигирзиг” ажыл-херээн ажыткан.
Эгелеп чоруур сайгарлыкчы чагыдып алыкчының күзели-биле торттарны болгаш кондитер кылыгларын чогаадыкчы каастап турар. Байырлал хүннеринде чагыглары каш катап көвүдей бээрин ол чугаалаан.
Энерел сеткилдиг Чочагай Бегзи хөй ажы-төлдүг өг-бүлелерге торттарын белекке берип, суму чергелиг мөөрейлерге база деткикчилеп турар.
Ажыл-херээн, хууда дузалал ажыл-агый ажыдып алыр күзелдиг улус чурттап турар чериниң аайы-биле Чонну ажылга хаара тудар төпче кээп болурун сагындыраал.