Улуг-Хем кожуунда «Чодураа» чайгы лагерьниң бир хүнү ада-өгбелеривистиң культуразы болгаш езу-чаңчылдарының мастерскаязынче шилчээнин республиканың немелде өөредилге сайзырадыр төвү дыңнаткан. Тыва дылдың хүнү чылыг-чымчак база чырык-чаагай байдалга эрткен.
Отряд бүрүзү биче төрээн чериниң езу-чаңчылдарын шиңгээткен. Уруглар улуг сонуургал-биле кырган-ава, кырган-ачаларындан дыңнааны шаандагы сөстерниң ужур-утказын сайгарып, адап өөренгеннер.
Улаштыр квест-оюннарга киришкеннер. Станцияларже аян-чоруктарны кылып тургаш, уруглар чүгле айтырыгларның баажызын тып эвес, а төрээн чериниң төөгүзүнге хамаарышкан онаалгаларны күүсеткеннер. Оолдар биле уруглар ырлажып, национал оюннарны ойнап, төрээн дылын билири – чоннуң чүрээнче дүлгүүр дээрзин бадыткааннар.
«Ол ышкаш Тыва дыл хүнүнде «Тыва – мээң төрээн чуртум» чуруктар мөөрейин организастаан. Уруглар төрээн чериниң каас-чараш бойдус-чурумалын: даглар, хемнерин, кызыгаар чок хову-шөлдерин чураан. Тыва – бистиң күжүвүс, чоргааралывыс» – деп, лагерьниң башкылары таныштырган.