Улуг-Хем кожууннуң Ча адар федерациязының төлээлери «Адалар болгаш уруглар» муниципалдыг төлевилел езугаары «Чодураа» лагеринде уруглар-биле ужуражылганы эрттиргенин республиканың немелде өөредилге сайзырадыр төвү дыңнаткан.
Аалчылар тыва спорттуң база бир хевири – ча адарынга мастер-классты организастаан. Мастер-класс үезинде айыыл чок чоруктуң техниказынче кол кичээнгейни углаан: оолдар биле уруглар ча адып тургаш, шын турарын, тынарын, согунну шын тударын өөренген.
Ужуражылганың практиктиг кезээнде арга-дуржулгалыг спортчуларның удуртулгазы-биле уруглар чаны адып шенээн. Дыка хөй уруглар, оолдар тыва чаны бир дугаар адып турган.
Каш-ла хонгаш чаа өөредилге чылы эгелээр. 2026 чылдың чайгы дыштанылгазы уругларга уттундурбас болуп артканы чугаажок.