Улуг-Хем кожуунда «Чодураа» уруглар лагеринге ийи чаа корпусту ажыглалче дужааган. Тудугну «Уругларга болгаш аныяктарга өөренир, дыштаныр, кадыкшылын быжыглаар байдалдарны тургузары» федералдыг төлевилел езугаар ону туткан.
Россияның Президентизи Владимир Путинниң даалгазы-биле эгелээн программа уругларның долу дыштанылгазынга болгаш кадыкшылын быжыктырарынга чаа тускай инфратургузугну эде чаартып болгаш тудар ужурлуг. Кампания 2030 чылга чедир уламчылаар, регионалдыг бюджеттен кады акшаландырар.
1967 чылда ажыттынган «Чодураа» лагери 60 чыл дургузунда Тываның бүгү-ле булуңнарындан уругларны хүлээп ап келген. Лагерьниң күчү-шыдалын бир-ле дугаар калбарткан. Чаа тудугларны чогуур технологтуг стандарттарны сагып, ээрер чагылар болгаш калбак демир ажыглап, туткан. Чаа чурттаар оран-сава таарымчалыг болгаш айыыл чок чурттаар байдалды тургузуп, немелде 60 уругну организастыг дыштанылгаже хаара тудар аргалыг болган.
Лагерьде эгелээн үшкү ээлчегде 153 уруг чаартынган байдалдарда дыштанып турар. 13 студия болгаш аңгы-аңгы спортчу бөлгүмнер, ол ышкаш орук шимчээшкининиң айыыл чок чоруктуң болгаш мергежил шилиир угланыышкынныг «Сээң шилилгең» деп социал-өөредилге угланыышкынныг кичээлдер эртир турар.
Тываның федералдыг программага киржилгезиниң ачызында, 2025 чылда «Чодураа» лагеринден аңгыда, Барыын-Хемчик кожууннуң «Таежный» лагеринде чемненир черни болгаш эмчи пунктузун бүрүнү-биле септеп селээн. Бо чылын Тес-Хем кожуунда «Сайлык» лагериниң чемненир чери биле эмнелге төвүн чаарткан.