Барыын-Хемчик кожууннуң С. Сүрүң-оол аттыг төп ном саңынга Бай-Тайга кожууннуң "Мөңгүлек" чечен чогаал каттыжыышкынының хоочуннары, шүлүкчү, чогаалчы кадыннар Светлана Самбый-оол база Наталья Салчак-биле "Чараш-дажым чажыды" деп чогаадыкчы ужуражылга болуп эрткенин каттыжыышкын дыңнаткан.
"Шүлүкчү-биле болчаг" деп ужуражылганың аалчылары боттарының амыр эвес чогаадыкчы оруун, уттундурбас солун ужуралдарын, чылыг-чырык сактыышкыннарын сонуургаткан.
Ужуражылгага Кызыл-Мажалыктың 1 дугаар школазының өөреникчилери, Ак-Довурактың даг-үлетпүр техникумунуң сургуулдары, "мажалыкчылар", чогаалга ынактар киришкен.
Тыва Республиканың алдарлыг ажылдакчызы, "Бай өнчү" төөгү-шинчилел музейиниң эргелекчизи Светлана Иргитовна бодунуң бижээн шүлүктерин номчаан. Наталья Пенеевна "Мөңгүлек" чечен чогаал каттыжыышкынын хөй чылдарда удуртуп турган. Бай-Тайга кожууннуң культуразының алдарлыг ажылдакчызы, кожууннуң ном саңының хоочун библиотекары, чогаалчы база-ла шүлүктерин номчаан.
Хоочун "мажалыкчылар" Маадыр Хомушку, Хүрең Доңгак сөс ап, онзагай солун сактыышкыннарны кылганнар.
Шуй сумузунуң культура ажылдакчылары Шолбанмаа Ооржак биле Шораан Күскүлүк аян тудуп, ырлашкан.
"Мажалык" чечен чогаал каттыжыышкынының удуртукчузу Орлан Кара-Сал "Мөңгүлектиң" хоочун кежигүннеринге солун ужуражылганы эрттиргени дээш четтиргенин илередип, "мажалыкчылар"-биле суй-белектерни сөңнээн.
Ужуражылганың төнчүзүнде чогаалчы кадыннар боттарының үнген чаа номнарын ном саңынга болгаш келген аалчыларга белек кылдыр бергеннер.