Чойган Ондар: «Ажыл уг-шиинче кирген, шимчеп чоруп турар»

Тыва дылдың келир үеде сайзыралы дээш ажылдап турар аныяк эртемденнерниң бирээзи, Тываның гуманитарлыг болгаш со¬циал-экономиктиг тускай шинчилелдер институдунуң дыл эртеминиң секторунуң эртем ажылдакчызы, филология эртемнериниң кандидады Чойган Ондар «Яндекс. Очулдурукчуже» тыва дылды киирериниң дугайында.

– Ажыл уг-шиинче кирген, шимчеп чоруп турар. Россияның нациялар ажыл-херээнге хамаарышкан федералдыг агентилелиниң «Бистиң чурттуң шупту чоннарының дылдары Яндекс.Очулдурукчуга турзун» дээн эгелээшкинин бүгү Тыва деткип турар.

Тываның албан черлери болгаш хөй-ниити организациялары 630 муң тыва-орус эжеш домактарны демнежип чыыптар деп дугурушкан улус бис.
Эрткен неделяда Национал школа хөгжүдер институтка, К.Б. Ондар аттыг Тыва үндезин культура төвүнге, А.С. Пушкин аттыг национал ном саңынга, К.И. Чуковский аттыг чаштар ном саңынга, Алдан-Маадыр аттыг национал музейге бо ажылга хамаарышкан семинарларны эрттирдивис. Бо организацияларның ажылдакчылары улуг ажылга киржир изиг күзелин илередип, төөгүлүг ажылга үүлевис киирер аас-кежиктиг-дир бис деп чугаалаарга өөрүнчүг, чоргаарланчыг чорду.

Бо неделяда Тываның чогаалчылар эвилелдеринге, «Тывамедиагрупп» Парлалга бажыңынга, Национал архивке, Тыва национал театрга семинарларны эрттирер бис.

Тываның тыва дыл болгаш чогаал башкыларының каттыжыышкыны, Тываның күрүне университеди, Ю.Ш. Күнзегеш аттыг Тываның ном үндүрер чери, Тываның аныяк эртемденнер болгаш тускай мергежилдиглер чөвүлели, Тываның гуманитарлыг болгаш тускай социал-экономиктиг шинчилелдер институду бо ажылда киржип турар – деп, аныяк эртемден соцчеткиде бижээн.