Чолаачыларга тускай хуудустар поликлиникаларга келбейн турган

Чолаачылаар эрге алыр шынзылга кылдыртыры-биле нарколог эмчиниң шинчилгезин эртип чадап турарының дугайында хомудалдар социал четкилерде көстүп келген. Оочур хөй болганындан каш хүн дургузунда безин эртип чадап турар улус бар.

Шак бо байдалдарның тургустунуп келгениниң чылдагааннарын, ук айтырыгны шиитпирлээри-биле кандыг хемчеглер кылдынып турарын республиканың наркология диспансериниң эмчи шинчилгелери эрттирип турар салбырының эргелекчизи Аяна Хертек-биле тайылбырны берген.

– Ажыы-биле чугаалаар болза, ээлчег айтырыы чылдан чылче чидигленип-ле турган болгай.

Бир дугаар ээлчегде чугулалап айтып каар чүүлүм болза, шак мындыг нарколог эмчиниң шинчилгезин негээр албан черлериниң саны көвүдеп келген. Ооң мурнунда кожуунда нарколог эмчиниң шинчилгези-биле шынзылгазы четчир турган болза, ам ыяап-ла лабораторлуг шинчилге негээр, бистиң шынзылга бижиивис негээр апарган таварылгалар хөй.

Ийиде, чурттап турар республикавыс колдуу дугуйлар кырында болгай, автомашиналыг улустуң саны чылдан чылче немежип олурар. Оон аңгыда, боо-чепсек эдилели негээр чаа мергежилдер база сөөлгү чылдарда немешкен.

Үште, часкы үе кезээде ээлчег көвүдээр үе кылдыр санаттынар, чүге-ле ийик, бо үеде кезээде кижи саны көвүдей бээр-дир. А бо хүннерде хенертен оочурнуң көвүдээни чолаачыларга тускай хуудус саазыннарның поликлиникаларга келбейн турганы-биле база холбажы берген, үр манаан улус хары угда хуудустар кээрге, оларны садып алгаш, мөөңү-биле кээп эгелээни ол.

Эмчилер санын көвүдедир айтырыг чүгле чонну эвес, а бисти база дүвүредип турар. Республикада каш чурттакчы чон барыл, ол хире чонга дүүштүрген санныг эмчилер турар деп чүүлдү база утпас болза эки.

Бир дугаарында диспансер дээрге эмнелге чери дээрзин чугулалап айтып каайн. Арага, наркотиктер дээш өске-даа хоралыг бүдүмелдерден аарып качыгдаан кижилерге эмчи дузазы чедирери – бистиң кол хүлээлгевис. Ооң-биле чергелештир чонга чолаачылаар, ок-чепсек эдилээр эрге алыр азы ажылга тургустунар, өөренип кирер дээн чергелиг таварылгаларда нарколог эмчи шинчилгезин эрттирип турар бис – деп, Аяна Хертек чугаалап турар.

Россияның Чазааның Даргазы Михаил Мишустин 2022 чылдың январь 1-ден тура 2023 чылдың декабрь 31-ге чедир хуусаазы төнүп турар чамдык документилерни, оларның иштинде чолаа¬чылаар эрге берип турар шынзылгаларның хуусаазын дараазында үш чылче узадыпкан. Ынчангаш бо айыттынган ийи чыл дургузунда чолаачылаар эргези төнүп турар улус эмнелге черинче үш чыл дургузунда далашпас болза, ажырбас апарган.