Тываның даш чонукчуларының эвилелиниң кежигүнү, «Тубтен Шедруб Линг» хүрээниң чурукчузу Сергек Салчак уругларга өөредиглиг кичээлди көргүскенин республиканың немелде өөредилге сайзырадыр төвү дыңнаткан.
Тывада IV делегей чергелиг сарыг шажын шуулганының чорудуу-биле «Чонар-даш» уран чүүлүнүң уругларга мөөрейи чарлаттынганын сагындыраал.
Сергек Салчак Бай-Тайга кожууннуң Кызыл-Даг сумузунга төрүттүнген. Даш ажылын бичиизинден тура сонуургап эгелээн. Чонар-дашты Сарыг-Хая деп черден ап турар. Шевер Моолдуң шажын чурулгазы университединге өөренип, бурганнарны дүрүм езугаар чуруур кылдыр өөренген. Ооң соонда Тываның хөгжүм-шии театрынга ажылдаан. Амгы үеде чаа хүрээде чурукчу.
Чонар-дашты сонуургап чоруур өөреникчилерге, чижээлээрге, алаңтос чечээн, шажынның дөрт күштүг амытаннарын чазаарын тайылбырлаан: «Өөреникчилер баштай дыка улуг эвес даштардан эгелеп алыр. Эң күштүг амытан – пар. Дашты шиңгээдип көөр, иштики сагыш-сеткилден даштың овур-хевири үнүп кээр. Ону кержек-биле хевиринче киир бичиилеп соктаар. Оон хол эгээзи-биле дескилеп алгаш, бижек-биле овур-хевирин чуруп, сиилбиир.
Оон аңгыда кижи бодунуң караанга чуруттунуп арткан овур-хевирлерин сиилбип болур. Чижээлээрге, мээң ачам чылгычы кижи чораан болгаш, караамга аът мал арткан. Ону сиилбип кылган мен. Эң-не кол чүүл – дашты шилип алгаш, ону шинчилеп көрүп олурарга, хевир-дүрзү үнүп келир».
Даш чонукчузу IV делегей чергелиг сарыг шажын шуулганының чонар-даш мөөрейинде жюри кежигүнү. https://vk.com/video-85378843_...