Бөгүн В. Көк-оол аттыг Национал хөгжүм-шии театрынга Культура ажылдакчызының хүнүнге тураскааткан байырлыг хемчег болуп эрткен.
Тываның Баштыңы Владислав Ховалыгның мурнундан ооң социал политика, кадык камгалал, культура айтырыгларын харыылап турар оралакчызы Орлан Сарыглар культура адырының ажылдакчыларынга болгаш хоочуннарынга, чалаткан хүндүлүг аалчыларга байыр чедирген.
– Бо чылгы байырлалдың онзагайы – уран чүүлдүң шылгараңгай ажылдакчызы, РСФСР-ниң алдарлыг артизи Виктор Шогжапович Көк-оол 120 харлаан оюн, Тываның Национал хөгжүм-шии театры 90 чыл оюн демдеглеп турарында. Сөөлгү чылдарда национал төлевилелдерниң ачызында культура инфратургузуун чаартыры-биле улуг ажылдар кылдынган. Таарымчалыг болгаш амгы үениң херексели-биле дериттинген культура бажыңнары, ном саңнары өг-бүлени болгаш ажы-төлдү бодунче хаара тудуптар сорунзалыг черлер болур. Тывада Тургузукчу күш-ажылдың болгаш өг-бүле ыдыктарының чылында бо угланыышкыннарже кол кичээнгейги угландырар бис.
“Көдээ черниң культура ажылдакчызы” программазы-биле 13 кижини ажылче хаара туткан. Бо программаны 2026 чылда уламчылап, 50 муң чедир чурттакчылыг черлерже 27 чаа культура ажылдакчыларын хаара тударын планнаттынган.
Август айда Тывага болуп эртер IV делегей чергелиг сарыг шажын шуулганынга культура ажылдакчылары чүгле республиканы эвес, а бүдүн чурттувусту төлээлээр харыысалгалыг болгаш хүндүлүг ажыл онаажыр – деп, оралакчы дарга бо чылгы байырлалдың онзагайын демдеглээн.
