Чоннуң иштики сагыш-сеткилин байыдар болгаш сайзырадыр

Тыва үндезин культура төвү 2014 чылдан тура “Ажык шөлге ойнап, хөглээлиңер!" деп аас чогаалынга үндезилеттинген тыва оюннар мөөрейин солагай болгаш оң талакы эриктиң дачалар ниитилелдериниң чурттакчы чонунга чыл санында эрттирип келген.

Чоннуң үндезин культуразын, уран чүүлүн, ооң иштинде чаңчылчаан культура адырларын сайзырыдыры, нептередири дээрге, кижи бүрүзүнүң кол хүлээлгези деп Тыва үндезин культура төвү санап турар.

Кызылдың солагай талакы эриинде дача ниитилелинде чоокта чаа ажыттынган “Эне-Сай” аттыг культура одааның ажыдыышкынынга Тыва үндезин культура төвүнүң директору Игорь Көшкендей болгаш артистери байыр чедирип, аян туткан. Олар культура ажылдакчылары-биле “Ажык шөлге ойнап, хөглээлиңер!" деп төлевилелди моон-даа соңгаар сайзырадып, келир үеде бир демниг кады ажылдаарынга идегелдиг.

Чаа ажыттынып келген чараш оюн-көргүзүг өргээзинге чоннуң иштики сагыш-сеткилин байыдар болгаш сайзырадыр чараш төлевилелдер ам-даа хөгжүп сайзыраарынга культура төвү йөрээп турар.