Өвүр кожууннуң чагырга даргазының хүлээлгезин күүседип турар Айдыс Куулар Тываның Баштыңының Айыткалында 2023 чылды Чоннуң чаңгыс эп-сеткилиниң чылы кылдыр чарлаанын онзалап демдеглээн.
– 2023 чылды – Чоннуң чаңгыс эп-сеткилиниң чылы кылдыр чарлааны, бистиң амгы бо үеде улуг чурттувустуң байдалынга кончуг таарышкан деп санаар-дыр мен. Ынчангаш шупту демнежип, чуртувусту, төрээн черивисти хөгжүдүп, чонувустуң чаагай амыдыралы дээш каттыжып алгаш ажылдаарывыс чугула.
2022 чылда республикавыска эвээш эвес тудуглар, септелгелер, чаартылгалар, адыр аайында хандырылгалар, өг-бүлелерге болгаш ажы-төлге дузаламчылар, көдээ ишчилерге база биче болгаш ортумак сайгарлыкчыларга деткимчелер, спортчуларывыстың чедиишкиннери дээш дыка хөй ажылдар чоруттунганын дыңнадывыс.
2023 чылда Өвүр кожууннуң девискээринде, Россия биле Моолдуң кызыгаарында «Хандагайты-Боршоо» эрттирилге пунктузу чүък болгаш пассажирлер эрттирери хөй талалыг апаары бистиң республикавыска кончуг улуг сайзырал болур.
Келир чылын суур бурузунге бичии уруглардан эгелээш улуг назынныг кижилерге чедир спартакиада эрттирер деп Спорт яамызынга даалга бергени сонуурганчыг болду. Спортче, кадык овур-хевирже, күш-культураже кичээнгейни салыр дээрге-ле – чоннуң чаагай амыдыралы-дыр.
«Мээң эмчим», «Мээң башкым» деп төлевилелдер боттанып эгелээри суурларга кончуг эки деп санаар мен. Суурларга хамаанчок, кожуун төптеринде кол-кол эмчилер, башкылар чедишпейн турарын билир бис. Бо төлевилелдерни кииргенин шын деп деткиир-дир мен.
«Ада-чурттувустуң камгалакчыларының өг-бүлелерин деткиир, оларже сагыш салыышкыны күштелдирер, уруг-дарыынга дузалажыр» – деп Владислав Товарищтайовичиниң сөстеринге катчып тур мен. Кожуунувус мурнундан чонувус-биле деңге сырый харылзаалыг болуп, демнежип ажылдаар бис.
Чонувус-биле сырый харылзаалыг болуп, демнежип ажылдаар бис
19 декабря 2022
49