Чурагай шилчилгезиниң төвү тургустунуп турар

Тывада экономика, социал болгаш күрүне эргелеп-башкарылгазының өзек адырларын чурагайжыдар сорулгалыг Чурагай шилчилгезиниң төвү ажылын эгелээн.

Республиканың Чазаа коммерцияга хамаарышпас автономнуг организациязы кылдыр төптү тургузар дугайында шиитпирни хүлээп алган. Тываның Баштыңы Владислав Ховалыгның чугаазы-биле, чаа структура чурагай шилчилгезиниң регионалдыг эчис сорулга боттаныышкыны-биле дүүштүрүкчү биле организастаар ажылды күүседир. Амыдыралдың бүгү-ле адырларынга информация технологияларны ынаар киирер.

Социал ачы-дузаларны электроннуг хевирже шилчидери, медээлер-биле ажылдаар албан черлерин хөгжүдери, электроннуг чазактың ажылын хандырары, ИТ-специалистерни белеткээри, эрге-чагырга органнарының ажыглалында информация системаларны база хамаатыларның амыдыралын экижидеринче угланган өске-даа чурагай төлевилелдерин нептередип, чаартып база үдээри ооң ажыл-чорудулгазынче кирип турар.

Республиканың информация системазының, ылаңгыя эргелеп-башкарылга органнарының, чурагайлыг айыыл чок чоруун хандырар хүлээлгени чурагай шилчилгезиниң төвүнде онааган. Амгы үеде ол угланыышкында бүгү-ле ачы-дузаларны тус черниң бюджеттеринден он-он сая рубльди шиңгээдип, өске регионнардан хүлээникчилер кылып турар. Боттуң төвүнге 40 хире чаа ажылчын олуттар ажыттынар, ынаар Тываның чурттакчыларын хаара тудар.

Республиканың ИТ-специалистеринге боттарының профессионал болгаш чогаадыкчы мергежилин боттандырар эптиг арга бар апаарын Владислав Ховалыг демдеглээн. «Улуска эптиг чаа сервистерни тургузарындан эгелээш, республиканың тус чер информация системазын чаңгыс четкиже тудуштурарынга база бүгү-российжи делгемнерге ону каттыштырарынга чедир дыка солун, канчаар-даа аажок хөй ажылдар манап турар» – деп, Тываның Баштыңы чаа тургустунар төптүң ажыл-чорудулгазынга хамаарыштыр чугаалаан.