Чурагайлыг экономика: Дүрген харылзаалыг интернетти суурларже

Россияның Президентизи Владимир Путинниң эгелээни “Чурагайлыг экономика” национал төлевилелдиң күүселдези-биле ырак-узак кызыгаар чоогу Качык сумузунда чурагайлыг дең-дески эвес чорукту чайладып, эрткен чылын харылзааның антенна-суургазын тудуп, тургускан.

Эрткен чылгы бүгү-российжи бадылаашкынның түңнелдери-биле «Чурагайлыг дең эвес чорукту чайладыры 2.0» федералдыг төлевилелди күүседип, бо чылын Бии-Хем кожуунда Ленинка арбанынче болгаш Мөңгүн-Тайга кожуунда Тоолайлыг суурже соталыг харылзааны киирер.

Президентиниң эгелээшкининиң ачызында, бөгүнде Успенка, Терлиг-Хая, Шаңчы, Ак-Чыраа, Сизим, Чал-Кежиг база Тарлаг суурларның школалары дүрген дамчыыр интернетте коштунган.

Россияда чурагайның дең эвес чоруун чайладыр дээн төлевилелдиң ийиги чадазы 2021 чылда эгелээн. 100-тен 500 чурттакчылыг биче суурларже мобильдиг харылзааны киирген. Тываның Ырбан, Качык, Хүт, Тал база Ийме суурлары ук төлевилел-биле эрткен чылын соталыг харылзаа болгаш интернеттиг болганын сагындыраал. Ол ышкан “Алдын-Булак” этнокультурлуг комплекске болгаш Дус-Хөлге дыштанып келгеннер база харылзаада.

“Чурагайлыг экономика” национал төлевилел 2030 чылга чедир уламчылаар. Тываның эрге-чагыргазы Россияның Чурагайлыг хөгжүлде яамызы-биле кады муңдан хөй чурттакчылыг ыраккы болгаш чедери берге суурларже оптиктиг удазын харылзаа шугумун киирер ажылды чорудуп турар. Ындыг суурларга Кунгуртуг, Кара-Хөл база Мөген-Бүрен хамааржыр.