Чуртталга оран-савазы болгаш хоорай хүрээлели: Үжен хөй-ниити дыштанылга черин чаагайжыдар

Президент Владимир Путинниң эгелээни «Чуртталга оран-савазы болгаш хоорай хүрээлели» национал төлевилел боттандырылгазы-биле республиканың шупту 19 муниципалдыг тургузугларынга 30 хөй-ниити девискээрин (чаа стадионнарны, сесерликтер, спорт шөлдерин болгаш өске-даа объектилерни) тудар.

Эрткен чылын апрельдиң 15-тен май 31-ге чедир чоруткан онлайн-бадылаашкынның түңнели-биле, ол төлевилелдерни амыдыралга боттандырар. Тываның 100 муң ажыг чурттакчызы бадылаашкынга киржип, идепкейи-биле Россияның регионнар аразындан үшкү черже үнген.

Кызылдың Мурнуу чүк микрорайонунга тудар деп планнаттынган «Тускай шериг операциязының киржикчилери маадырларның парыгы» төлевилел эрткен чылдың онлайн-бадылаашкынынга эң хөй үннү алганын ТР-ниң Тудуг яамызы дыңнаткан. Төлевилел езугаар ийи гектар шөлдүг паркка Тывадан тускай шериг операциязының девискээринге мөчээн оолдарның адын сиилбээн тураскаалдыг мемориалдыг комплексти тудар.

Найысылалга көвүрүгден оң талакы эриктиң дачалар ниитилелинге чедир чадаг-терге оруун, «Кызылдың Каа-Хем кудумчузундан Интернациональная кудумчузунга чедир Дружба кудумчулап аллея» хөй-ниити девискээрин база чаагайжыдар.

Чадаана хоорайның «Тос кожуун төвү» төлевилели тиилекчилер санынче кирген. Паркты «Чадаана» стадионунуң артынга кылыр. Уруглар ойнаар, чадаг-тергежилерге база скейт-бордистерге тускай шөлдерни, эрик кыдыынга дыштаныр черлерни чаагайжыдар. «Ча-согун», «Тыва акшалар» база «Тыва үжүктер» темалыг галереяны кылыр. Ол ышкаш кафе база сценалыг шөлчүгешти база тудар.

Ак-Довурак хоорайга база өскерлиишкин көстүп келир. «Ак тоолчургу чугаа» төлевилел улусчу бадылаашкында тиилээн. Ак-довуракчыларның кол чери – Төп кудумчу амгы үении-биле шиметтинер. Чаңгыс аян-шинчи-биле спорт шөлүн, чаа арт-объектилерни, фото-девискээрлерни тудар.

Тывага шилиттинген төлевилелдерни боттандырынга федералдыг бюджеттен 100 сая рубльди тускайлаан. Республикага ол программа ажылдап эгелээнден бээр 145 хөй-ниити шөлдери чаагайжыттынган.