Тываның 14 хардан 18 харга чедир аныяк чурттакчылары дыштанылга үезинде азы кичээлдер соонда дыштанырының орнунга, ажылдаар күзелдиг.
ТР-ниң Күш-ажыл болгаш социал политика яамызының 2025 чылдың январь-сентябрьда элээдилерниң ажылга хаара туттунганының түңнелдерин үндүрген медээлери ону көргүскен.
Чыл эгезинден бээр республикада 1295 назы четпээн уруг ажылда хаара туттунган, азы эрткен чылдың ол-ла үезинге деңнээрге 92 кижи хөй. «Чурттакчы чонну ажылга хаара тударын деткиири» деп регионалдыг программа-биле элээдилерге ажылчын олуттарны тургузарынче 3,2 сая рубльди республика бюджединден тускайлаан.
Чурттакчы чонну ажылче хаара тудар төптер-биле керээ чарган 88 ажыл берикчизи организациялар элээдилерни ажылда хүлээп алган. «Социал айыылдыг» бөлүктен оолдар, уругларны бирги ээлчегде ажыл-биле хандырар. Ол дээрге эвээш хандырылгалыг, хөй ажы-төлдүг, долу эвес база чединмес өг-бүлелерден, өскүстер болгаш ада-иезиниң хайгааралы чок арткан база чурум үрээш профилактика даңзызында турар элээдилер-дир.
Ажылдарны школалар, суму чагыргалары болгаш муниципалдыг бүдүрүлгелер сүмелеп турар. Олар элээдилерни девискээрлер арыглаар болгаш чаагайжыдар, школа чанының огородтарынга ногаа өзүмнерин олуртур болгаш ажаап-өстүрер, ном саңының фондузун эмгелеп чурумчудар дээш, өске-даа ажылдарда хаара тудуп турар. Ай дургузунда берге эвес ол ажылдарны кылгаш, ортумаа-биле 2,5 муң рубльди ажылдап алганнар.
