Чылдар эрткен тудум, Ада-чурт дайынының киржикчилериниң одуруунуң саны эвээжеп турар

Тывада Ада-чурттуң Улуг дайынының ийи хоочуну бар. Кызыл хоорайда чурттап турар маадырларывыс: Георгий Васильевич Абросимов, Наталья Ивановна Маслова.

Ада-чурттуң Улуг дайынының киржикчилеринге деңнеп каан хоочуннар: Кызыл хоорайда Кирилл Иванович Марков, Таңды кожууннуң Балгазында Илларион Васильевич Шелепов, Кызыл кожууннуң Каа-Хем суурда Анатолий Михайлович Крутиков.

“Бүзээлеткен Ленинградтың чурттакчызы” деп хөрек демдээниң эдилекчизи – Кызылдан Борис Борисович Подгорный. Фашистиг концлагерьлерге хоругдадып чораан Тожу кожууннуң Ырбан суурдан Алефтина Илларионовна Ширинкина.

Тывада бо хүнде тылдың 69 ажыл-ишчизи бар. Бистиң өгбелеривистиң фашизмге удур демиселге маадырлыг күш-ажылының демдээ болур “Кызыл кош” деп тураскаал Кызылда ажыттынган. Ында Тывадан тылдың ишчилериниң Улуг Тиилелгеге киириштирген үлүг-хуузун мөңгежидип сиилбээн. 1941-1944 чылдарда тыва чоннуң фронтуга берген материалдыг дузазының ниити түңү 70 хире сая рубльге дең.

Чылдар эрткен тудум, Ада-чурт дайынының киржикчилериниң одуруунуң саны эвээжеп турар. Ынчангаш бистиң амгы үевис тайбың болзун дээш дайызыннар-биле тулчуп турган эрес-дидим маадырларывысты кичээнгей, сагыш човаашкын-биле бүргээри, хүн бүрүде хүндүткелди бараалгадыры, бистиң алдарлыг чаңгыс чер-чурттугларывыстың салым-чолун таварыштыр аныяктарны ада-чуртчу чорукче хаара тудары – бистиң дорт хүлээлгевис.