Бо неделяның дургузунда Тывага Бүгү-россияның педагогтуг уран-мергежил мөөрейиниң регионалдыг чадазы, ооң иштинде «Чылдың башкызы» мөөрей болуп эртерин ТР-ниң Өөредилге яамызы дыңнаткан.
1990 чылда республика чергелиг «Чылдың башкызы» мөөрейниң бир дугаар тиилекчизи Алла Некрасова болганын сагындыраал. Ол – Тоора-Хем ортумак школазының орус дыл болгаш чогаал башкызы. Бо күзүн Алла Инокентьевна 75 харлаар.
– Бо удаада мөөрейниң киржикчилеринге онзагай чыл болуп турар. 1990 чылда бир дугаар «Чылдың башкызы» деп мөөрейни эрттирген. Киржикчилерде ийи дакпыр харыысалга онаашкан – мөөрей Ада-чурт камгалакчызының чылында база Улуг Тиилелгениң 80 чыл оюнуң бүдүүзүнде 35 дугаар эртип турар. Киржикчи бүрүзү мөөрейниң шенелделерин төлептиг эртип, өөредилге-кижизидилге ажылында эң тергиин арга-дуржулгазын, бодунуң бедик билиг-мергежилин бараалгадырын күзеп тур мен – деп, өөредилге сайыдының хүлээлгезин күүседип турар Ренат Ооржак бодунуң блогунда дыңнаткан.
Мөөрейниң шенелделери сес аңгы шөлчүгешке эртер. Ооң школа иштиниң чадазынга 3628 кижи, кожуун чергелиг мөөрейлерге 1346 кижи киришкен, а регионалдыг чадага киржири-биле 246 башкы келгенин сагындыраал.
Элээн каш чыл дургузунда «Чылдың башкызы» мөөрейниң тиилекчизи бир сая рубльди шаңнал кылдыр ап турар.