«Чылдың өг-бүлези-2026» бүгү-российжи мөөрейниң регионалдыг чадазының түңнелдерин чарлаан

Кызылдың Өг-бүле парыгынга Бүгү-делегейниң өг-бүле хүнүнүң бүдүүзүнде, «Чылдың өг-бүлези-2026» бүгү-российжи мөөрейниң регионалдыг чадазының тиилекчилерин шаңнап-мактаар езулал болуп эрткен.

Тываның Баштыңы [id360104045|Владислав Ховалыгның] бо чылын чарлааны Тургузукчу күш-ажылдың болгаш өг-бүле ыдыктарның чылынга мөөрейни тураскааткан.

ТР-ниң Чазак даргазының оралакчызы Орлан Сарыглар мөөрейниң киржикчилеринге байыр чедирген. Өг-бүле ниитилелдиң үндезини, ужур-чаңчылдарның болгаш мөзү-шынарның үнелиг чүүлдериниң камгалакчызы болуп арткан деп ол демдеглээн.

«Бистиң ниити сорулгавыс – өг-бүле харылзааларында болгаш ажы-төл кижизидилгезинде, өг-бүлениң чаагай чоруунга, ада-иениң харыысалгазынга, өг-бүле бүрүзүнүң социал турум чоруун тударынга сүзүглелдиң болгаш мөзү-бүдүштүң чаагай чаңчылдарын кадагалап арттырарынга байдалдарны тургузары болур. Ынчангаш Тываның Чазааның өг-бүлелерниң аңгы-аңгы бөлүктеринге хөй санныг деткимче хемчеглерин боттандырып турар, ол ажыл ам-даа уламчылаар» – деп, Чазак Даргазының оралакчызы демдеглээн.

«Чылдың өг-бүлези» мөөрейниң регионалдыг чадазы Тывада 2017 чылдан эгелеп эртип турар, бо чылын бүгү республикадан 53 өг-бүле аңаа киришкен. Алды бөлүкте тиилекчилерни тодараткан.

«Алдын өг-бүле» номинацияга Кызылдан Кара-оол биле Биче Биче-оолдарның өг-бүлези тиилекчи болган. Өг-бүле чартык чүс чыл ажыг эгин кожа чурттап, чеди ажы-төлдү өстүрүп, оларга күш-ажылга болгаш өг-бүлениң чаңчылдарынга хүндүткелди дамчыдып кижизиткен.

«Ада-чурт камгалакчызының өг-бүлези» номинацияга Улуг-Хем кожуундан Петр биле Долаана Барбак-оолдарның өг-бүлези шылгараан. Өг-бүлениң баштыңы тускай шериг операциязынга киржип турар, а ооң өөнүң ишти шериг албан-хүлээлгелиглерни деткээн эки турачы ажылында идепкейлиг киржип чоруур.

Кызылдан Евгений биле Ангелина Достаннар алды ажы-төлдү төлептиг кижизидип, «Хөй ажы-төлдүг өг-бүле» деп номинацияга тиилээннер. Өг-бүле амгы үеде оглунуң эмнээшкини-биле холбашкан берге үени эртип, чаңгыс демниин болгаш быжыг тура-соруун көргүзүп чоруурлар.

«Көдээ өг-бүле» деп бөлүкке Эрзин кожуундан Буянды биле Марита Назыннарның өг-бүлези тиилекчи болган, олар теве малды азырап малдап чоруур үшкү салгал болуп, ону ажы-төлүнге дамчыдып чоруурлар.

Чеди-Хөл кожуундан Валерий биле Любовь Дамдыннар – «Өг-бүле – езу-чаңчылдарның кадагалакчызы» номинацияның тиилекчилери. Өг-бүле тыва культурага, ыры-хөгжүмге, национал ужур-чаңчылдарга камныг хамаарылгазы-биле сурагжаан.

«Аныяк өг-бүле» номинацияга Барыын-Хемчик кожуундан Ак-оол биле Чараштаа Ооржактар төлептиг болган. Чеди ажы-төлдүг аныяк өг-бүле кожууннуң хөй-ниити амыдыралында идепкейлиг киржип, быжыг болгаш эп-найыралдыг өг-бүлениң үлегер-чижээн көргүзүп чоруурлар.

Байырлыг езулал үезинде мөөрейниң тиилекчи болгаш шаңналдыг черлер алган өг-бүлелеринге дипломнарны болгаш тураскаалдыг белектерни тывыскан.