Чаа-Хөлдүң Кара даг деп черге доозукчулар аразынга чылдың эрттирип турар чаңчыл болган пляж спортунуң хевирлеринге маргылдаалар болуп эрткенин кожууннуң аныяктар болгаш спорт херектериниң талазы-биле килдизи дыңнаткан.
Чаа-Хөл кожууннуң чагырга даргазы Аркадий Одегей маргылдааның киржикчилеринге байыр чедирген. Бо чылын спортчу хемчеглерни 2023 чылдың доозукчулары демнежип эрттирген.
Кайгамчык чараш чурумалдыг, «алдын элезинниг» хем эриинге чеди команда элезинге хол база бут бөмбүүнге, сумо база хүрешке күжүн шенешкен. Бут бөмбүүнге бир черде 2024 чылдың, хол бөмбүүнге 2019 чылдың доозукчулары. Сумога Олчана Очур-оол, хүрешке Сайын-Белек Монгуш олар тиилээн.
Команда аайы-биле бирги черни 2021 чылдың, ийиги-үшкү черлерни 2025 чылдың доозукчулары чаалап алган. Чемпион командага кубокту дамчыткан. Тиилекчилерге дириг хойларны, өртектиг белектерни тывыскан.
