Чыраа-Бажының эмчи амбулаториязында

Чөөн-Хемчик кожууннуң Чыраа-Бажы сумузунда чаа туттунган эмчи амбулаториязында коронавирус хамчыынга, грипп база чидиг респираторлуг вирустуг халдавырга удур тарылганы тургускан план езугаар чорудуп турар. Бо талазы-биле ажыл уламчылавышаан.

Эмчи амбулаториязының уруглар эмчизи Аяна Монгуштуң чугаазы-биле алырга, сумуда ханының базыышкыны, чүрек-дамыр аарыглары колдап турар.

– Бисте терапевтиң олуду хостуг, удавас коллектививиске эмчи немежип келиринге бүзүреливис улуг. Берге байдалдыг улус таваржып келзе, кожууннуң төп эмнелгезинден дүрген дуза чедирер станцияның эмчилерин чалаптар бис.

Амбулаторияда уруглар эмчизи, херээженнер эмчизи, эмчи сестразы, фельдшер, санитар, ийи одакчы ажылдап турар – деп, Аяна Монгуш ажылын таныштырган.

Эмчи амбулаториязы амгы шагның медицина дериг-херекселдери-биле четчелеттинген, изиг-соок суглуг, арыгланып-аштаныр өрээлдиг болгаш сөөлгү санитарлыг негелделерге дүгжүп турар. Эмчилерниң хайгааралында суурнуң 1512 чурттакчы бар. Олар таарымчалыг байдалга бирги эмчи дузазын алыр аргалыг апарган.

Ээлчеглиг аппарат хуралынга Тываның кол санитар эмчизи Людмила Салчак грипп база чидиг респираторлуг вирустуг халдавыр талазы-биле эпидемиологтуг сезон чоокшулап турарын дыңнаткан. Ооң уржуундан ук халдавырлыг аарыгларга удур тарылганы шапкынчыдар сорулганы медицина албан черлериниң мурнунга салган. Амдыызында республикада ниити планның 33 хуузу күүсеттинген.

Чыраа-Бажы сумузунуң чурттакчылары халдавырлыг аарыгларга удур боттарын-даа, чоок кижилерин-даа камгаладып, тарыдып ап турарлар.