Чыргаландының эрес-кежээ ногаажызы

Тес-Хем кожууннуң Чыргаланды сумузунуң чурттакчыларының хөй кезии ногаа аймаа тарып өстүрүп турар.

Эрес-кежээ огородчуларның бирээзинге Чыргаланды сумузунуң чагырга даргазының социал политика талазы-биле оралакчызы Долаана Коданмай хамааржыр.

Сумунуң үлегерлиг өг-бүлези чылдың-на чаңгыс чер-чурттугларынга арга-дуржулгазын дамчыдып, мастер-класстарны эрттирип турар. Өгнүң кыс ээзиниң бажыңында соңгаларының адаккы эргининде чаш үнүштериниң баштары элээн өскен.

Ажы-төлү-биле кады бажың чанында огородка ногаа аймаа тарып өстүрери дээрге-ле оларны ажыл-ишче өөредири, эрес-кежээ кижилер кылдыр кижизидери дээрзи бүгүдеге билдингир-ле болгай. Огурец, помидор, перец, свекла, морковь дээш өске-даа ногаа аймаа уруг-дарыгның организминге ажыктыг витаминнер-биле байлак, аъш-чемге немере.