Майның дыштаныр хүннеринде ПЦР-анализ дужаар лабораторияларның ажылдаар чуруму. Кызылга лабораторлуг шинчилелдер кылыр үш медицина албан черлери ажылдаар.
Май 4-5 хүннеринде Тываның СПИД-ке удур камгалал болгаш демисел төвүнүң (Оюн Курседи кудумчузу, 159А) лабораториязы, 8.00 шактан 18.00 шакка чедир.
Май 4,5,6,7,8 хүннеринде – Республиканың кеш болгаш шээр аарыглар диспансериниң (Щетинкин-Кравченко кудумчузу, 66) лабораториязы, 8.00 шактан 18.00 шакка чедир.
Май 4,5,9,10 хүннеринде – Халдавырлыг аарыглар эмнелгезиниң (Чехов кудумчузу, 65) лабораториязы, 8.00 шактан 18.00 шакка чедир.
Ол ышкаш ТР-ниң Кадык камгалал яамызы республиканың чурттакчыларын май 9-та Covid-19 хамчыынга удур тарыдып база катап тарыдып алырынче чалап турар. Көжүп чоруур тарылга пунктузу Владимир Биче-оол аттыг хүреш стадионунга 11.00 шактан 16.00 шакка чедир ажылдаар.
Тарылга чорудар пунктуже келирде, дараазында документилерни бодунга ап алыр: паспорт, СНИЛС болгаш медицина полизи.
Covid-19-тан боттарыңарны болгаш чоок кижилериңерни камгаладып алыңар.
