Дөгээ дааның шыпшыынче он муң базым

Тываның хөй-ниити кадыкшылга болгаш медицина профилактика төвүнүң ажылдакчылары “Амыдыралче 10000 базым” деп бүгү-российжи акцияны Аныяктар хүнүнге тураскаадып Дөгээ дааның баарынга эрттирген.

Амыдыралдың кадык овур-хевирин суртаалдап, чурттакчы чоннуң күш-культуржу шимчээшкинин бедидип, кадыкшылганың бөдүүн арга-хевирлерин нептередири – акцияның сорулгазы.

2015 чылдан бээр бүгү-российжи акция чурттуң аңгы-аңгы шөлчүгештеринде эрттирип турар. Россия Федерациязының 700 ажыг чурттакчылыг черлеринден сая ажыг кижи чылдың-ан акцияга киржири чаңчыл апарган.

Кижи кезээде шимчээшкинге чоруур дизе, хүнде-ле 6 муңдан 10 муң базымны кылган турур ужурлуг дээн Бүгү-делегейниң кадык камгалал организациязының сүмелээни езугаар, “Амыдыралче 10000 базым” деп акция эртип турар.

Хөй-ниити кадыкшылга төвүнүң ажылдакчылары даг эдээнге хан базыышкынын хемчээр булуңну организастаан. Акцияның киржкичилеринге болгаш кызылчыларга шын чемненириниң болгаш кадык амыдырал талазы-биле арга-сүмелерлиг хуудустарны үлээн.

Ук хемчегге назы-хар дивейн хөй кижилер киришкен. Акцияның киржикчизи болур дизе спортчу болуру албан эвес, а арыг агаарга селгүүстеп алыр дээш, аңаа-ла чедип келири кол турган. Ол эптиг арганы 175 кижи ажыглап, кадыкшылын быжыглаан он муңдан-даа хөй базымны Дөгээ даанче кылган.