Бо чылын Тывага “Чурагайлыг экономика” национал төлевилелдиң ачызында “Чурагайлыг дең эвес чорукту чайладыры 2.0” төлевилелдиң боттандырылгазы уламчылаар.
2023 чылда дүрген харылзаалыг мобильдиг интернетти баштай киирер 100-тен 500 чурттакчылыг суурларның даңзызынче Тывадан Ырбан, Качык болгаш Хүт сумулары кирген. Даңзыны “Интернетти суурже” төлевилелдиң эрткен чылын чоруткан чоннуң онлайн-бадылаашкынны-биле тургускан.
ТР-ниң чурагайлыг хөгжүлде сайыды Идегел Монгуштуң дыңнатканы-биле алырга, Эрзин кожууннуң Качык сумузунда харылзааның антенна-суургазын тудуп, тургузуп эгелээн.
“Чурагайлыг экономика” национал төлевилелиниң боттандырылгазы республикага харылзаа ачы-дузазының шынарын улам экижидеринге, чедери берге, эвээш чурттакчылыг ырак суурларга соталыг харылзааны чедиреринге, республиканың девискээринге чурагайлыг дең-дески эвес чорукту чайладырынга салдары улуг.
