Бо чылын Тывага “Чурагайлыг экономика” национал төлевилелдиң ачызында “Чурагайлыг дең эвес чорукту чайладыры 2.0” төлевилелдиң боттандырылгазы уламчылаар.
Россияның Чурагайлыг хөгжүлде яамызы 2023 чылда дүрген харылзаалыг мобильдиг интернетти баштай киирер 100-ден 500 чурттакчылыг суурларның даңзызын парлаан. Тывадан ук сан-даңзыже Ырбан, Качык болгаш Хүт сумулары кирген. Даңзыны “Интернетти суурже” төлевилелдиң эрткен чылын чоруткан чоннуң онлайн-бадылаашкынны-биле тургускан.
ТР-ниң чурагайлыг хөгжүлде сайыды Идегел Монгуштуң дыңнатканы-биле алырга, Тожу кожууннуң Ырбан сумузунда харыл¬зааның антенна-суургазын тудуп, тургузуп эгелээн. Федералдыг төлевилелдиң оператору – “Ростелеком” компаниязы (Теле2).
Качык сумузунга тудуг ажылдары апрель айда, Хүт сумузунга сентябрь айда эгелээрин регионнуң Чурагайлыг хөгжүлде яамызы дыңнаткан.
Тываның Чурагайлыг хөгжүлде яамызы республикага чурагайлыг харылзааның девискээрин калбартыр, ооң шынарын улам экижидер талазы-биле ажылдарны регионнуң харылзаа операторлары-биле кады чедиишкинниг чорудуп турар.
“Чурагайлыг экономика” национал төлевилелиниң боттандырылгазы республикага харылзаа ачы-дузазының шынарын улам экижидеринге, чедери берге, эвээш чурттакчылыг ырак суурларга соталыг харылзааны чедиреринге, республиканың девискээринге чурагайлыг дең-дески эвес чорукту чайладырынга салдары улуг.
