Дүрген харылзаалыг интернетти Кунгуртуг, Кара-Хөл база Мөген-Бүрен суурларже

Федералдыг Чазак Тываның ыраккы суурларынче дүрген харылзаалыг интернетти чорударын акшаландырар. Тере-Хөл кожуннуң Кунгуртуг, Бай-Тайга кожууннуң Кара-Хөл, Мөңгүн-Тайга кожууннуң Мөген-Бүрен ыраккы чурттакчылыг черлерже харылзааның оптиктиг удазын шугумун шөер төлевилелдиң боттанылгазы 2024 чылда эгелээр.

Тываның Баштыңы Владислав Ховалыг Россияның чурагайлыг хөгжүлде, харылзаа болгаш массалыг коммуникация сайыды Максут Шадаев-биле ужуражылга үезинде ооң дугайында дугуржуп чугаалашкан. Республиканың муң ажыг чурттакчылыг суурларындан бөгүнде артып каан ол ыраккы үш суурже харылзааның оптиктиг удазын шугумун шөер ажылдарны федералдыг бюджеттен акшаландырар болган.

– «Россия Федерациязының чурагайлыг экономика» национал төлевилелиниң «Информация инфратургузуу» федералдыг төлевилелинге Тыва 2019 чылдан эгелеп киришкеш, 1080 километр харылзааның оптиктиг удазын шугумун тутканын сагындараал. 139 чурттакчылыг черлерге дүрген харылзаалыг интернетти кошкан соонда, телемедицина, ырактан харылзажыр өөредилге, электроннуг сервистер ажыглалының шынары экижээн.

Эмнелге албан черлери аарыг кижилерни ырактан хүлээп, регионалдыг болгаш федералдыг клиникалардан коллегалары-биле видеохарылзаа сеансыларын организастап, өөредилге албан черлери онлайн-кичээлдерни эрттирип, күрүне эрге-чагырга органнары күрүне ачы-дузаларының порталынга документилер солчулгазын болгаш ажылын дүргедеткен.

Кунгуртуг, Кара-Хөл база Мөген-Бүрен суурлар ырак болгаш чедери берге черде болганындан, чурагайлыг депшилгеден чыдып каан. Бөгүнде ол суурларның чурттакчылары чүгле 2G биле спутниктен интернетти ажыглап турар. Ынаар харылзааның оптиктиг удазын шугумун шөйери техниктиг чайлыг кылдына бээр айтырыг-дыр – деп, Владислав Ховалыг бодунуң блогунда демдеглээн.

Тываның Баштыңының федералдыг Чазакка чедип алган дугуржулгазы-биле ам ол суурларже дүрген харылзаалыг интернетти киирер. Барык 400 километр харылзааның оптиктиг удазын шугумун шөери планнаттынган.

Владислав Ховалыг республика нарын, улуг болгаш аар өртектиг төлевилелди боттандырарын демдеглээн. Россияның Чурагай яамызы федералдыг бюджеттен 350 сая рубльди үндүрерин санаан. Төлевилел ажылдары келир чылын эгелээр болза, ооң боттанылгазы ийи чыл уламчылаар.